23/06/2021

ເປັນເລື່ອງ

ເປັນຂ່າວ

ຜົນກວດວິເຄາະໃນຈໍານວນ 3.596 ຕົວຢ່າງ ພົບຜູ້ຕິດເຊື້ອເພີ່ມ 105 ຄົນ

ທ່ານ ນາງ ພອນປະເສີດ ໄຊຍະມຸງຄຸນ ຮອງຫົວໜ້າກົມຄວບຄຸມພະຍາດຕິດຕໍ່ກະຊວງ ພ້ອມດ້ວຍ ທ່ານ ປະນອມ ຟອງມະນີ ຮອງຫົວໜ້າກົມອະນາໄມ ແລະ ສົ່ງເສີມສຸຂະພາບ ກະຊວງສາທາລະນະສຸກ, ຕາງໜ້າກອງເລຂາ ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19, ໄດ້ຖະແຫຼງສະພາບການລະບາດຂອງພະຍາດ COVID-19 ຢູ່ ສປປ ລາວ ໃນວັນທີ 6 ພຶດສະພານີ້ ທີ່ກະຊວງສາທາລະນະສຸກ.

ສຳລັບ ສປປ ລາວ ມາຮອດປັດຈຸບັນມີ ຜູ້ຕິດເຊື້ອທັງໝົດ 1.177 ຄົນ (ໃໝ່ 105) ບໍ່ມີຜູ້ເສຍຊີວິດ, ໃນຈຳນວນຜູ້ຕິດເຊື້ອທັງໝົດ ແມ່ນໄດ້ຮັບການປິ່ນປົວຫາຍດີ 101 ຄົນ, ຍັງນອນຕິດ ຕາມປິ່ນປົວຢູ່ສະຖານທີ່ຄະນະສະເພາະກິດກຳນົດໄວ້ໃນແຕ່ລະແຂວງ ຈຳນວນ 1.076 ຄົນ; ວຽກງານວິເຄາະກວດຊອກຫາເຊື້ອພະຍາດໂຄວິດ-19 ໃນວັນທີ 5 ພຶດສະພາ 2021 ໄດ້ເກັບ ຕົວຢ່າງມາກວດວິເຄາະທັງ ໝົດ 3.596 ຕົວຢ່າງ ຜົນກວດວິເຄາະແມ່ນພົບຜູ້ຕິດເຊື້ອໃໝ່ 105 ຄົນ, ໃນນັ້ນ ນະຄອນຫຼວງ 15 ຄົນ, ຈໍາປາສັກ 12 ຄົນ, ບໍ່ແກ້ວ 72 ຄົນ (ຕົ້ນເຜິ້ງ 70 ຄົນ ແລະ ບໍ່ແກ້ວ 2 ຄົນ) ແລະ ສະຫວັນນະເຂດ 2 ຄົນ, ວຽງຈັນ 2 ຄົນ ແລະ ຜົ້ງສາລີ 2 ຄົນ. ສໍາລັບການຕິດຕາມຜູ້ເດີນທາງເຂົ້າມາ ສປປ ລາວ ວັນທີ 5 ພຶດສະພາ 2021 ທົ່ວປະເທດມີຜູ້ເດີນທາງເຂົ້າມ ທັງໝົດ 2.400 ຄົນ ທຸກຄົນທີ່ເຂົ້າມາທາງຈຸດຜ່ານແດນ ແມ່ນໄດ້ຜ່ານການວັດແທກອຸນຫະພູມຮ່າງກາຍ, ແຕ່ບໍ່ພົບຜູ້ມີ ອາການເປັນໄຂ້ ໄດ້ເກັບຕົວຢ່າງທຸກໆຄົນມາກວດຫາເຊື້ອ COVID-19; ນຳສົ່ງໄປຈຳກັດບໍລິ ເວນຢູ່ສູນທີ່ຄະນະສະເພາະກິດກຳນົດໄວ້;ວຽກງານການຈຳກັດບໍລິເວນຢູ່ສູນຈຳກັດບໍລິເວນ ປັດຈຸບັນ ທົ່ວປະເທດມີສູນຈໍາກັດບໍລິເວນທີ່ເປີດນຳໃຊ້ຢູ່ ທັງໝົດ 56 ສູນ, ມີຜູ້ຈໍາກັດບໍລິເວນທັງໝົດ 3.496 ຄົນ, ທຸກຄົນແມ່ນໄດ້ເກັບຕົວຢ່າງມາກວດວິເຄາະຫາເຊື້ອພະຍາດ COVID-19.

ຕໍ່ກັບສະພາບການລະບາດຂອງພະຍາດ ປັດຈຸບັນລັດຖະບານ ກໍຄືຄະນະສະເພາະກິດ ແລະ ອຳນາດການປົກຄອງທຸກຂັ້ນໄດ້ເອົາໃຈໃສ່ ໃນການຕິດຕາມຈັດຕັ້ງປະຕິບັດ ຄຳສັ່ງ, ແຈ້ງການ ແລະ ຄຳແນະນຳ ຂອງແຕ່ລະພາກສ່ວນຢ່າງເຂັ້ມງວດ ເພື່ອເຮັດແນວໃດສະກັດກັ້ນ ບໍ່ໃຫ້ພະຍາດມີການແຜ່ຂະຫຍາຍ ເປັນວົງກວ້າງອອກໄປຕື່ມອີກ; ມາດຕະການທີ່ວາງອອກໃນນະຄອນຫຼວງໄລຍະນີ້ ກໍແມ່ນເພື່ອແນ່ໃສ່: ປິດການເຂົ້າ-ອອກ ບໍ່ໃຫ້ຜູ້ຕິດເຊື້ອອອກໄປແຜ່ເຊື້ອຕື່ມ ແລະ ບໍ່ໃຫ້ຄົນຈາກບ່ອນອື່ນເຂົ້າມາຈຸດສ່ຽງ; ທີມງານເຝົ້າລະວັງພະຍາດ ກໍເອົາໃຈໃສ່ໃນການຄົ້ນຫາຜູ້ຕິດເຊື້ອໃຫ້ໄດ້ໄວ ໂດຍການເພີ່ມຈຸດບໍລິການກວດ ເຊື້ອພະຍາດຂຶ້ນຫຼາຍຈຸດ ເພື່ອຄົ້ນຫາຜູ້ຕິດເຊື້ອໄດ້ໄວ ແລ້ວນຳເຂົ້າໄປປິ່ນປົວໂດຍທັນທີ ແລະ ລະດົມປະຊາຊົນ ແລະ ຜູ້ຢູ່ໃນກຸ່ມເປົ້າໝາຍສັກຢາ ໃຫ້ໄດ້ໄປສັກຢາວັກຊິນກັນພະຍາດໂຄວິດ-19 ຊຶ່ງກໍເປັນຊ່ອງທາງໜຶ່ງ ທີ່ຈະຫຼຸດຜ່ອນການແຜ່ເຊື້ອພະຍາດໃນສັງຄົມ; ພ້ອມນີ້ກໍຂໍແຈ້ງໃຫ້ທ່ານຊາບວ່າ ທ່ານສາມາດຮັບຂໍ້ມູນຂ່າວ ສານທີ່ຖືກຕ້ອງ ແລະ ເປັນທາງການໄດ້ຈາກໂທລະພາບ, ວິທະຍຸ ແລະ ໜັງສືພິມ ແລະ ເວັບໄຊຂອງ ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດພະຍາດໂຄວິດ-19 covid19.gov.la; ເຟດບຸກຂອງສູນຂ່າວສານການແພດ ແລະ ສຸຂະສຶກສາ, ກະຊວງສາທາລະນະສຸກ; ເວັບໄຊຂອງ ກົມຄວບຄຸມພະຍາດຕິດຕໍ່, ກະຊວງສາທາລະນະສຸກ cdc.gov.la ແລະ ສາມາດໂທສອບຖາມ ສາຍດ່ວນ 165 ຫຼື 166 ສໍາລັບສູນກາງ ແລະ ສາຍດ່ວນຂອງບັນດາແຂວງ ແມ່ນຕາມດ້ວຍລະຫັດ ຂອງແຕ່ລະແຂວງ 165 ຫຼື 166.

(ຂ່າວ-ພາບ: ຍຸພິນທອງ)