04/08/2021

ເປັນເລື່ອງ

ເປັນຂ່າວ

ສິງກະໂປ ເຕືອນໂຄວິດ ຈະຢູ່ກັບມະນຸດຢ່າງຖາວອນ

ຂ່າວຕ່າງປະເທດລາຍງານ ເມື່ອວັນທີ 10 ພຶດສະພາທີ່ຜ່ານມາ, ທ່ານ ວິວຽນ ບາລາກຣິສນັນ ລັດຖະມົນຕີກະຊວງການຕ່າງປະເທດສິງກະໂປ ກ່າວວ່າ: ພະຍາດໂຄວິດ-19 ຈະເປັນໂຣກປະຈຳຖິ່ນໃນມວນມະນຸດ ຊຶ່ງໝາຍຄວາມວ່າ ຈະບໍ່ມີວັນຫາຍໄປຢ່າງຖາວອນ ເພາະມັນກະຈາຍໄປທົ່ວໂລກຫຼາຍເຖິງຂະໜາດທີ່ອັດຕາການກາຍພັນ ແລະ ສາຍພັນໃໝ່ໆ ຈະເກີດຂຶ້ນຢ່າງຕໍ່ເນື່ອງ, ລະດັບພູມຕ້ານທານຂອງມວນມະນຸດຈະຄ່ອຍໆຫາຍໄປ.

ທ່ານ ວິວຽນ ບາລາກຣິສນັນ ໄດ້ກ່າວເຕືອນວ່າ: ໃນຂະນະນີ້, ຄົນທີ່ສີດວັກຊິນແລ້ວປະມາດ ອາດຈະອັນຕະລາຍຍິ່ງກວ່າຄົນທີ່ບໍ່ໄດ້ສີດວັກຊິນ. ການສີດວັກຊິນ ທີ່ສໍາຄັນຄົນທີ່ສີດແລ້ວມີອາການໜ້ອຍລົງ, ເຈັບປ່ວຍຮຸນແຮງໜ້ອຍລົງ, ແຕ່ການສີດວັກຊິນພຽງຢ່າງດຽວ ບໍ່ແມ່ນຢາວິເສດທີ່ຈະສາມາດຢຸດຕິການຕິດເຊື້ອໄດ້ ຊຶ່ງຕ້ອງອາໄສມາດຕະການອື່ນໆດ້ວຍເຊັ່ນ: ການເວັ້ນໄລຍະຫ່າງ ແລະ ການຄວບຄຸມຊາຍແດນ ກໍອາດຈະກັບມາໃຊ້ອີກ ເພື່ອປ້ອງກັນການຕິດເຊື້ອຮອບໃໝ່ຕະຫຼອດໃນໄລຍະ 2 ປີນີ້.

ຂ່າວລະບຸວ່າ: ເມື່ອທ້າຍອາທິດທີ່ຜ່ານມາ ສິງກະໂປ ໄດ້ອອກມາດຕະການຄວບຄຸມຫຼາຍຂຶ້ນ ພາຍຫຼັງການຕິດເຊື້ອໃນຊຸມຊົນເພີ່ມສູງຂຶ້ນ ສົ່ງຜົນໃຫ້ຈຳນວນຜູ້ຕິດເຊື້ອສະສົມຫຼາຍກວ່າ 61.300 ຄົນ ແລະ ເສຍຊີວິດແລ້ວ 31 ຄົນ. ທ່ານ ບາລາກຣິສນັນ ກ່າວຕື່ມວ່າ: ພົນລະເມືອງສິງກະໂປ ປະມານ 20% ໄດ້ສີດວັກຊິນແລ້ວ, ແຕ່ລັດຖະບານບໍ່ໄດ້ກຳນົດເກນຂັ້ນຕ່ຳໃນການໄດ້ພູມຕ້ານທານ, ເນື່ອງຈາກພະຍາດໂຄວິດສາຍພັນໃໝ່ເກີດຂຶ້ນເລື້ອຍໆ ລະດັບພູມຕ້ານທານໃນປະເທດ ຈຶ່ງອາດຈະປ່ຽນໄປ.