23/06/2021

ເປັນເລື່ອງ

ເປັນຂ່າວ

ບໍ່ແກ້ວມີຜູ້ຕິດເຊື້ອສະສົມແລ້ວ 356 ຄົນ ຫລາຍເປັນອັນດັບ 2 ຮອງຈາກນະຄອນຫລວງ

ຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ແຂວງບໍ່ແກ້ວໃຫ້ຮູ້ວ່າ: ແຂວງບໍ່ແກ້ວກໍ່ບໍ່ຕ່າງຫຍັງກັບແຂວງອື່ນໆໃນຂອບເຂດທົ່ວ ປະເທດທີ່ໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19 ຊຶ່ງພາຍໃນແຂວງຮອດວັນທີ 13 ພຶດສະພາ 2021 ມີຜູ້ຕິດເຊື້ອສະສົມຈາກພະຍາດດັ່ງກ່າວນີ້ແລ້ວ 356 ຄົນ ໂດຍເປັນອັນດັບສອງຂອງປະເທດທີ່ພົບຜູ້ຕິດເຊື້ອດັ່ງກ່າວ ຮອງຈາກນະຄອນຫຼວງວຽງຈັນ ແລະ ຍັງກວດພົບຜູ້ຕິດເຊື້ອໃນແຕ່ລະວັນ.

ເພື່ອປ້ອງກັນພະຍາດດັ່ງກ່າວບໍ່ໃຫ້ແຜ່ລາມເປັນວົງກວ້າງ ແລະ ຍາກທີ່ຈະປ້ອງກັນ, ຄະນະສະເພາະກິດໄດ້ມີການປິດການເຂົ້າ-ອອກ ຊົ່ວຄາວ ລະຫວ່າງແຂວງ ເມືອງ ຂອບເຂດບ້ານທີ່ມິການລະບາດ (ຄົນໃນບໍ່ໃຫ້ອອກ ແລະ ຄົນນອກບໍ່ໃຫ້ເຂົ້າ) ເວັ້ນແຕ່ຜູ້ທີ່ມີຄວາມຈໍາເປັນ ໄປປິ່ນປົວສຸຂະພາບຢູ່ໂຮງໝໍ ແລະ ໄປຊື້ເຄື່ອງອຸປະໂພກ ບໍລິໂພກ ແຕ່ຕ້ອງໄດ້ຮັບອະນຸຍາດຈາກເຈົ້່າໜ້າທີ່ ທີ່ກ່ຽວຂ້ອງ, ໄດ້ສັ່ງປິດກິດຈະການຊົ່ວຄາວຈໍານວນ 98 ຫົວໜ່ວຍຊຶ່ງປະກອບມີໂຮງງານອຸດສາຫະກຳ ແລະ ຫັດຖະກຳ, ໂຮງງານເພີນີເຈີ ແລະ ໂຮງງານອື່ນໆ ຊຶ່ງໄດ້ມີກຳມະກອນທີ່ເຮັດວຽກຢູ່ໂຮງງານແຕ່ລະແຫ່ງ ເກືອບ 700 ກວ່າຄົນ ວ່າງງານ.


ຄະນະສະເພາະກິດໃຫ້ຮູ້ຕື່ມວ່າ: ນອກນັ້ນຍັງມີຕະຫຼາດທຸກໆແຫ່ງພາຍໃນເທດສະບານເມືອງຫ້ວຍຊາຍ ແລະ ເມືອງອື່ນໆ ທົ່ວແຂວງບໍ່ແກ້ວ, ບັນດາຫົວໜ່ວຍທຸລະກິດດ້ານການທ່ອງທ່ຽວ, ໂຮງແຮມ ເຮືອນພັກ, ຮ້ານອາຫານ-ກິນດື່ມ, ຮ້ານຄາຣາໂອເກະ, ຮ້ານບັນເທີງ ແລະ ການຂົນສົ່ງທາງບົກ-ທາງນໍ້າກໍ່ຖືກປິດກິດຈະການຊົ່ວຄາວເຊັ່ນກັນ.