23/06/2021

ເປັນເລື່ອງ

ເປັນຂ່າວ

ເຈົ້າຫນ້າທີ່ລົງກວດກາລາຄາສິນຄ້າ ຕາມຕະຫຼາດ ແລະສູນການຄ້າ

ໃນວັນທີ 15 ພຶດສະພາ 2021 ເຈົ້າໜ້າທີ່ຕໍາຫຼວດປ້ອງກັນເສດຖະກິດ ປກສ ນວ ແລະ ພະແນກອຸດສະຫະກໍາ ແລະ ການຄ້າ ນະຄອນຫຼວງວຽງຈັນ ລົງກວດກາສິນຄ້າຕົວຈິງ ຢູ່ບັນດາຕະຫຼາດ ແລະ ສູນການຄ້າພາຍໃນ 4 ຕົວເມືອງ ຂອບເຂດນະຄອນຫຼວງວຽງຈັນ ມີທັງໝົດ 17 ຈຸດ ເພື່ອຄວບຄຸມລາຄາສິນຄ້າບໍ່ໃຫ້ກາຍເກີນລາຄາທີ່ກໍານົດໄວ້.


​ ຜ່ານການລົງຕິດຕາມກວດກາຕົວຈິງ ຂອງເຈົ້າໜ້າທີ່ ແລະ ພາກສ່ວນທີ່ກ່ຽວຂ້ອງ ໄດ້ແບ່່ງອອກເປັນ 4 ຈຸ ຄື: ຈຸເມືອງຈັນທະບູລີ, ຈຸເມືອງສີສັດຕະນາກ, ຈຸເມືອງສີໂຄດຕະບອງ ແລະ ຈຸເມືອງໄຊເສດຖາ ຄື: ຕະຫຼາດທົ່ງຂັນຄໍາ, ຕະຫຼາດໂພນຕ້ອງຈອມມະນີ ເມືອງຈັນທະບູລີ; ຕະຫຼາດຂົວດິນ, ຕະຫຼາດທົ່ງພານທອງ, ຕະຫຼາດສີຂຽວດອນກອຍ, ຕະຫຼາດສວນມອນ ເມືອງສີສັດຕະນາກ; ຕະຫຼາດສີໄຄ, ຕະຫຼາດໜອງດ້ວງ, ຮ້ານມິນີມາກບິກຊີ ສາຂາສີໄຄ, ຮ້ານຊີ້ນ ຊີພີ ສາຂາຂຸນຕາ ເມືອງສີໂຄດຕະບອງ; ຕະຫຼາດກະສິກໍາອິນຊີ, ຕະຫຼາດໄຮ່ຄໍາ, ຕະຫຼາດໂນນຄໍ້, ຕະຫຼາດຫົວຂົວ, ຕະຫຼາດດົງຈອງ, ຮ້ານໂຊກທະວີມິນີມາກເກັດ ສາຂາໜອງບອນ ຮ້ານເບີມາກ ສາຂາໂພນເຄັງ ເມືອງໄຊເສດຖາ ເຊິ່ງເຫັນວ່າ: ບັນດາຮ້ານຄ້າ ແລະ ພາຍໃນຕະຫຼາດຂາຍສິນຄ້າຕາມລາຄາທີ່ພະແນກອຸດສະຫະກໍາ ແລະ ການຄ້າ ກໍານົດໄວ້; ພ້ອມທັງ ໄດ້ລົງແນະນໍາໃຫ້ຕະຫຼາດທົ່ງຂັນຄໍາ ແລະ ຕະຫຼາດໂພນຕ້ອງຈອມມະນີ ໃຫ້ເພີ່ມມາດຕະການປ້ອງກັນພະຍາດໂຄວິດ-19 ຕື່ມອີກ; ເຊິ່ງແຕ່ລະຈຸດ ທີ່ໄດ້ລົງຕິດຕາມກວດກາ ແມ່ນໄດ້ມີມາດຕະການປ້ອງກັນພະຍາດໂຄວິດ-19 ໄດ້ເປັນຢ່າງດີ.


​ ເພື່ອຮັບປະກັນຕໍ່ກັບການແຈ້ງການ ປ້ອງກັນ, ສະກັດກັ້ນ ແລະ ຄວບຄຸມການແຜ່ລະບາດຂອງເຊື້ອພະຍາດໂຄວິດ-19 ທີ່ກໍາລັງແຜ່ລະບາດໃນປັດຈຸບັນ. ກອງບັນຊາການ ປ້ອງກັນຄວາມສະຫງົບ ນະຄອນຫຼວງວຽງຈັນ ຂໍຄວາມຮ່ວມມືນໍາບັນດາຫົວໜ່ວຍທຸລະກິດ, ບໍລິສັດ, ຫ້າງຮ້ານ ແລະ ພະນັກງານທີ່ໃຫ້ບໍລິການ ຈົ່ງເປັນເຈົ້າການມີສະຕິ ພ້ອມກັນຈັດຕັ້ງປະຕິບັດຕາມຄໍາສັ່ງເລກທີ 15/ນຍ ລົງວັນທີ 21 ເມສາ 2021 ວ່າດ້ວຍການເພີ່ມທະວີມາດຕະການປ້ອງກັນ, ສະກັດກັ້ນ ແລະ ຄວບຄຸມ ການແຜ່ລະບາດເຊື້ອພະຍາດໂຄວິດ-19 ແລະ

ຫາກພົບເຫັນ ຕະຫຼາດ ແລະ ສູນການຄ້າໃດ ສວຍໂອກາດຂຶ້ນລາຄາສິນຄ້າ ໃຫ້ແຈ້ງເບີວັອດແອັບ 0202889974 ຫຼື ອິນບັອກຊ໌ ຜ່ານຊ່ອງທາງເຟສບຸກ ລາຍການປ້ອງກັນຄວາມສະຫງົບ ນະຄອນຫຼວງວຽງຈັນ.