23/06/2021

ເປັນເລື່ອງ

ເປັນຂ່າວ

ໄວລຸ້ນຄຽດໃຫ້ຕຳຫຼວດຈະລາຈອນ

ໃນຕອນເຊົ້າຂອງວັນທີ 14 ພຶດສະພາ 2021 ນີ້ ທາງໜ່ວຍງານ ຄະດີອາຍາ ພະແນກຕຳຫຼວດ ກອງບັນຊາການ ປກສ ເມືອງອຸທຸມພອນ ໄດ້ສົມທົບກັບພາກສ່ວນທີ່ກ່ຽວຂ້ອງ ນຳເອົາຕົວຜູ້ຖືກຫາ ຈຳນວນ 02 ຄົນ ລົງໄປເຮັດແຜນປະກອບຄະດີ ທີ່ມີຄົນຮ້າຍໄດ້ຈູດປ້ອມຍາມ ຂອງເຈົ້າໜ້າທີ່ຕຳຫຼວດຈະລາຈອນ ທີ່ຕັ້ງຢູ່ບ້ານໄຊອຸດົມ ເມືອງອຸທຸມພອນ.


ຕາມການລາຍງານຂອງເຈົ້າໜ້າທີ່ຕຳຫຼວດ ໜ່ວຍງານຄະດີອາຍາ ພະແນກຕໍາຫຼວດ ກອງບັນຊາການ ປກສ ເມືອງອຸທຸມພອນ ໄດ້ໃຫ້ຮູ້ວ່າ: ໃນເວລາປະມານ 21 ໂມງ 30 ນາທີ ຂອງວັນທີ 28 ກຸມພາ 2021 ໄດ້ຮັບແຈ້ງວ່າ ປ້ອມຍາມຈະລາຈອນ ທີ່ຕັ້ງຢູ່ ບ້ານໄຊອຸດົມ ເມືອງອຸທຸມພອນ ຖືກໄຟໄໝ້. ຈາກນັ້ນ ທາງວິຊາສະເພາະຄະດີອາຍາ ກໍ່ໄດ້ລົງກວດກາສະຖານທີ່ເກີດເຫດ ຈຶ່ງສາມາດສະຫຼຸບເບື້ອງຕົ້ນໄດ້ວ່າ ອາດຈະເກີດຈາກການຈູດຂອງຄົນຮ້າຍ, ຈາກນັ້ນ ກໍ່ໄດ້ມີການຂຶ້ນບັນຊີຕິດຕາມເປົ້າໝາຍທີ່ກໍ່ເຫດ.

ມາຮອດວັນທີ 29 ມີນາ 2021 ເວລາປະມານ 20 ໂມງ ທາງເຈົ້າໜ້າທີ່ ຈຶ່ງໄດ້ກັກຕົວຜູ້ຖືກຫາໄດ້ 02 ຄົນຄື: ທ້າວ ລາຊັນ (ໃໝ່) ອາຍຸ 17 ປີ ອາຊີບ ກຳມະກອນ ຢູ່ບ້ານໄຊອຸດົມ ເມືອງອຸທຸມພອນ ແຂວງສະຫວັນນະເຂດ ແລະ ທ້າວ ດາວພະສຸກ (ກະຢ່ອງ) ອາຍຸ 20 ປີ, ອາຊີບກໍາມະກອນ ຢູ່ບ້ານໄຊອຸດົມ ເມືອງອຸທຸມພອນ ແຂວງສະຫວັນນະເຂດ.

ຜ່ານການສືບສວນ-ສອບສວນ ພວກກ່ຽວທັງສອງໄດ້ໃຫ້ການວ່າ: ໃນວັນທີ 28 ກຸມພາ 2021 ພວກກ່ຽວໄດ້ພາກັນໄປນັ່ງດື່ມເບຍ ຢູ່ຮ້ານແຫ່ງໜຶ່ງເຂດ ບ້ານໄຊອຸດົມ ຍ້ອນມີແນວຄິດຄຽດແຄ້ນໃຫ້ເຈົ້າໜ້າທີ່ຕຳຫຼວດຈະລາຈອນ ເພາະເຄີຍໄດ້ກັກລົດ ແລະປັບໃໝພວກກ່ຽວ ຕໍ່ມາ ພວກກ່ຽວກໍ່ໄດ້ຊວນກັນຍ່າງໄປເອົານ້ຳມັນເອັດຊັງ ປະມານ 1 ລິດ ທີ່ ທ້າວ ລາຊັນ ເປັນຜູ້ຊື້ມາປະໄວ້ຢູ່ເຮືອນຂອງ ທ້າວ ສວຍ ໝູ່ຂອງພວກກ່ຽວ.

ຈາກນັ້ນ ທ້າວ ລາຊັນ ແລະ ທ້າວ ດາວພະສຸກ ກໍ່ໄດ້ນຳເອົານ້ຳມັນດັ່ງກ່າວ ຍ່າງລັດປ່າ ເພື່ອໄປຈູດປ້ອມດັ່ງກ່າວ ເມື່ອເຫັນວ່າໄຟລຸກໄໝ້ ພວກກ່ຽວກໍ່ຟ້າວແລ່ນເມືອເຮືອນຂອງ ທ້າວ ດາວພະສຸກ. ດັ່ງນັ້ນ ເຈົ້າໜ້າທີ່ຕຳຫຼວດ ຈຶ່ງໄດ້ຕັ້ງຂໍ້ຫາກັບເຫດການດັ່ງກ່າວ ເຫັນວ່າ ທ້າວ ລາຊັນ ແລະ ທ້າວ ດາວພະສຸກ ແມ່ນຜິດໃນສະຖານ ການທຳລາຍ ແລະການເຮັດໃຫ້ຊັບເປ້ເພໂດຍເຈດຕະນາ ຈຶ່ງໄດ້ດຳເນີນຄະດີ ສົ່ງໃຫ້ໄອຍະການຕໍ່ໄປ.