08/03/2021

ເປັນເລື່ອງ

ເປັນຂ່າວ

ຜູ້ປະກອບການວັງວຽງ ຍິ້ມໄດ້ອີກຄັ້ງ ຫຼັງນັກທ່ອງທ່ຽວເພີ່ມຂຶ້ນ

ວັງວຽງ ແຂວງວຽງຈັນ ຖືເປັນອີກເມືອງທ່ອງທ່ຽວທາງທຳມະຊາດທີ່ແຂກພາຍໃນ ແລະຕ່າງປະເທດໃຫ້ຄວາມສົນໃຈຫຼັງມີການແຜ່ລະບາດຂອງພະຍາດໂຄວິດໄດ້ເຮັດໃຫ້ບັນຍາກາດງຽບເຫງົາຜູ້ປະກອບການພົບບັນຫາແຕ່ມາຮອດປະຈຸບັນຫຼັງລັດຖະບານເປີດເສັ້ນທາງສາຍດ່ວນ ແລະ ເປັນປີລາວທ່ຽວລາວຖືວ່າເຮັດໃຫ້ມີນັກທ່ອງທ່ຽວ ເພີ່ມຂຶ້ນ 80% ຜູ້ປະກອບການມີຮ້ອຍຍິ້ມຂຶ້ນມາອີກຄັ້ງ.

ທ່ານ ກວຽນທອງ ເທບທິດາ ຮອງເຈົ້າເມືອງວັງວຽງໃຫ້ສຳພາດນັກຂ່າວໜັງສືພິມເສດຖະກິດ-ສັງຄົມຮູ້ວ່າ: ເມືອງວັງວຽງນັບວ່າເປັນທີ່ຮູ້ຈັກ ແລະເປັນທີ່ຮັບຄວາມນິຍົມຊົມຊອບຂອງນັກທ່ອງທ່ຽວທັງພາຍໃນ ແລະຕ່າງປະເທດກັບທຳມະຊາດ ແລະພູຜາຫີນທີ່ສວຍງາມຊຶ່ງໄລຍະຜ່ານມາທາງເມືອງກໍໄດ້ເອົາໃຈໃສ່ຈັດຕັ້ງປະຕິບັດໂດຍສະເພາະການຮັກສາສິ່ງແວດລ້ອມ, ປົກປັກຮັກສາປ່າໄມ້, ການຄຸ້ມຄອງສິນຄ້າ ແລະອື່ນໆ.

ສຳລັບການທ່ອງທ່ຽວຂອງເມືອງວັງວຽງພາຍຫຼັງການແຜ່ລະບາດຂອງພະຍາດໂຄວິດ-19 ນັບແຕ່ປີ 2020 ເປັນຕົ້ນມາເຮັດໃຫ້ທົ່ວໂລກກໍ່ຄື ສປປ ລາວ ເວົ້າສະເພາະເມືອງວັງວຽງແຂວງວຽງຈັນ ໄດ້ຮັບຜົນກະທົບ ແລະບາງກິດຈະການເຖິງຂັ້ນປິດໄປ.

ແນວໃດກໍ່ຕາມປະຈຸບັນຖືວ່າເປັນໂອກາດດີທີ່ທາງລັດຖະບານໄດ້ເປີດການນຳໃຊ້ເສັ້ນທາງດ່ວນວຽງຈັນຫາວັງວຽງບວກເປັນປີລາວທ່ຽວລາວເຮັດໃຫ້ໄລຍະເດືອນຜ່ານມາການທ່ອງທ່ຽວຂອງເມືອງວັງວຽງກັບມາມີບັນຍາກາດຄຶກຄື້ນຂຶ້ນສະເລ່ຍຕົວເລກເພີ່ມຂຶ້ນ 80% ແລະ ກໍ່ເຮັດໃຫ້ບາງຫົວໜ່ວຍທຸລະກິດຂອງເມືອງກັບມາຟື້ນໂຕ ແລະເຫັນຮ້ອຍຍິ້ມຜູ້ປະກອບການອີກຄັ້ງປະຈຸບັນເມືອງວັງວຽງແມ່ນມີສະຖານທີ່ທ່ອງທ່ຽວທັງໝົດ 40 ແຫ່ງຈຸດທ່ຽວຖໍ້າ 26 ແຫ່ງ, ຊົມວິວ 5 ແຫ່ງ ແລະອື່ນໆອີກຫຼາກຫຼາຍ.

ໂອກາດດັ່ງກ່າວທາງທີມຂ່າວເສດຖະກິດ-ສັງຄົມກໍ່ໄດ້ສຳພາດທ່ານ ບຸນພັນ ວົງສຳພັນ ປະທານບໍລິສັດທ່ອງທ່ຽວວັນເດີຟູນລາວສຳຫຼວດອອກແບບ ແລະ ກໍ່ສ້າງຄົບວົງ ຈອນເປັນນັກທຸລະກິດເມືອງວັງວຽງໃຫ້ຮູ້ວ່າ: ໃນນາມຕົນເອງເປັນຜູ້ປະກອບການສະຖານທີ່ທ່ອງທ່ຽວຖໍ້ານາງຟ້າ, ຖໍ້ານອນມີຄວາມຮູ້ສຶກດີໃຈທີ່ເຫັນເມືອງວັງວຽງກັບມາມີບັນຍາກາດອີກຄັ້ງໂດຍສະເພາະເດືອນຜ່ານມາຕົວເລກເຂົ້າມາສະຖານທີ່ເຮົາແມ່ນ 80% ຖ້າທຽບໃສ່ເມື່ອກ່ອນ.

ທ່ານ ນາງໄກ ເຈົ້າຂອງຄລີຟວີວ ຣີເວີໄຊ ລີສອດ ແລະຮ້ານອາຫານກໍ່ໃຫ້ສຳພາດພວກເຮົາວ່າ: ໃນນາມທີ່ຕົນເອງເປັນຜູ້ປະກອບການຄ້າຂາຍມາຫຼາຍປີກໍ່ມີຄວາມຮູ້ສຶກດີໃຈທີ່ເຫັນເມືອງວັງວຽງກັບມາມີສີສັນ ແລະ ເຮັດໃຫ້ການຄ້າຂາຍກັບມາປົກກະຕິຊຶ່ງເດືອນຜ່ານມາການຊື້ຂາຍແມ່ນມີບັນຍາກາດຄຶກຄື້ນດີຫຼາຍທີ່ສັງເກດເຫັນບາງມື້ເຄື່ອງມາໃຫ້ບໍລິການແມ່ນເກືອບບໍ່ພຽງພໍແຕ່ສິ່ງສຳຄັນສຸດດີໃຈແມ່ນໄດ້ເຫັນຊາວເມືອງວັງວຽງ ແລະ ຜູ້ປະກອບການຫຼາຍຄົນມີຮ້ອຍຍິ້ມອີກຄັ້ງໂດຍສະເພາະແມ່ນຈະ ສ້າງວຽກເຮັດງານທຳພະນັກງານມີວຽກເຮັດລ້ຽງຄອງຊີບຕົນເອງ.

ແນວໃດກໍ່ຕາມ ສຳລັບເມືອງວັງວຽງຖືວ່າເປັນເມືອງຍອດນິຍົມໃນດ້ານການທ່ອງທ່ຽວຊຶ່ງປະຈຸບັນທາງເມືອງກໍ່ຍັງເຂັ້ມງວດຮັກສາຄວາມປອດໄພປະຊາຊົນ ແລະນັກທ່ອງ ທ່ຽວຈາກພະຍາດໂຄວິດໂດຍໃຫ້ຜູ້ປະກອບການແຕ່ລະບ່ອນຈັດຕັ້ງປະຕິບັດຕາມໜ່ວຍງານສະເພາະກິດແນະນຳທີ່ສຳຄັນເພື່ອເປັນການຝື້ນຟູເສດຖະກິດກັບມາໄວຂຶ້ນທາງເມືອງໃນຮ່ວມ ກັບຜູ້ປະກອບການໄດ້ມີເງິນກູ້ດອກເບ້ຍ 3% ທີ່ຈະໄດ້ເຮັດໃຫ້ເມືອງວັງວຽງກັບມາສີສັນ ແລະ ເປັນທີ່ຍອມຮັບແຂກພາຍໃນ ແລະຕ່າງປະເທດທ່ານ ກວຽນທອງເທບທິດາຮອງເຈົ້າເມືອງວັງວຽງກວ່າຢໍ້າ.
**********
ຂ່າວ: ເສດຖະກິດ-ສັງຄົມ