08/03/2021

ເປັນເລື່ອງ

ເປັນຂ່າວ

ຫວຽດນາມຕັ້ງເປົ້າອີກ 25 ປີ ກາຍເປັນປະເທດພັດທະນາແລ້ວ

ສຳນັກຂ່າວຕ່າງປະເທດລາຍງານເມື່ອວັນທີ 1 ກຸມພາ 2021 ວ່າ ທ່ານຫງຽນ ຟູຈ່ອງ ທີ່ຫາກໍ່ໄດ້ຮັບເລືອກຈາກສະພາແຫ່ງຊາດຫວຽດນາມ ໃຫ້ດຳລົງຕຳແຫນ່ງເລຂາທິການໃຫ່ຍພັກຄອມມູນິດ ແລະປະທານປະເທດ ຫວຽດນາມຕໍ່ເນື່ອງເປັນສະໄຫມທີ 3 ຖະແຫລງການຫລັງສຳເລັດກອງປະຊຸມໃຫ່ຍພັກຄອມມູນິສຫວຽດນາມວ່າ ພັກໄດ້ເປັນເອກະພາບໃນການປັບເປົ້າຫມາຍຕາມແຜນພັດທະນາເສດຖະກິດຂອງປະເທດໃນໄລຍະ 5 ປີ ລະຫວ່າງປີ 2021-2025 ໃຫ້ມີອັດຕາການຂະຫຍາຍໂຕເພີ່ມສູງຂື້ນຈາກທີ່ເຄີຍກຳນົດໄວ້ສຳຫລັບຊ່ວງ 5 ປີທີ່ຜ່ານມາ ຈາກປີລະ 6 ສ່ວນຮ້ອຍ ເປັນປີລະ 6.5 ສ່ວນຮ້ອຍ ຫາ 7 ສ່ວນຮ້ອຍ

ໂດຍຈະດຳເນີນການເພື່ອຂະຫຍາຍບົດບາດຂອງປະເທດໃນຖານະເປັນສູນກາງການຜະລິດຂອງບໍລິສັດຍັກໃຫ່ຍ ລະດັບໂລກ ເຊັນ ຊຳຊຸງ ແລະອິນເທລ ຜ່ານການລົງທຶນໂດຍກົງຂອງຕ່າງປະເທດຊຶ່ງຈະປ່ຽນຈາກການເນັ້ນປະລິມານມາເປັນຄຸນນະພາບ ແລະກຳນົດເປົ້າຫມາຍຍົກລະດັບຫວຽດນາມຂື້ນຈາກການເປັນແຫລ່ງຜະລິດທີ່ຕ້ອງເພິ່ງພາແຮງງານ ເປັນສູນກາງຂອງການຜະລິດດ້ວຍວິທະຍາສາດ ແລະເທັກໂນໂລຢີ ພ້ອມກັນນັ້ນກໍ່ສ້າງຄວາມຫລາກຫລາຍໃຫ້ກັບການສົ່ງອອກຂອງປະເທດ ໂດຍອາໄສຄວາມຕົກລົງການຄ້າເສລີທີ່ຫວຽດນາມມີຢູ່ກັບອີກກ່ວາ 10 ປະເທດຕໍ່ໄປ

ທ່ານຫງຽນ ຟູຈ່ອງຍັງລະບຸອີກວ່າ ຫວຽດນາມຕັ້ງເປົ້າຫມາຍກ້າວຂື້ນສູ່ການເປັນປະເທດພັດທະນາແລ້ວໂດຍສົມບູນໃຫ້ໄດ້ພາຍໃນປີ 2045 ຫລືອີກ 25 ປີຂ້າງຫນ້າ ໃນຂະນະດຽວກັນການກວາດລ້າງການສໍ້ລາດບັງຫລວງພາຍໃນພັກຄອມມູນິສຫວຽດນາມທີ່ກຳລັງດຳເນີນຢູ່ໃນຂະນະນີ້ກໍ່ຕ້ອງດຳເນີນຕໍ່ໄປຢ່າງເດັດຂາດ