08/03/2021

ເປັນເລື່ອງ

ເປັນຂ່າວ

ດ່ານພາສີສາກົນ ນໍ້າພາວ ບໍລິຄຳໄຊ ເກັບລາຍຮັບຫຼຸດແຜນ

ຕາມການໃຫ້ສຳພາດຂອງທ່ານ ແກ້ວວິລາ ທິບດາລາ ຫົວໜ້າດ່ານພາສີສາກົນນໍ້າພາວ-ເກົາແຈ່ວ ແຂວງບໍລິຄຳໄຊ ສປປ ລາວ – ແຂວງຮ່າຕິ່ງ ສສ ຫວຽດນາມ ໄດ້ໃຫ້ສຳພາດຕໍ່ນັກຂ່າວແຂວງເມື່ອບໍ່ດົນມານີ້ ວ່າ: ເຈົ້າໜ້າທີ່ພາສີທີ່ປະຕິບັດໜ້າທີ່ຢູ່ດ່ານສາກົນນໍ້າພາວ ໄດ້ມີຫ້ອງການປະຈໍາຢູ່ 2 ຈຸດຄື: ຈຸດຊາຍແດນ (505) ແລະ ຈຸດຫຼັກ 20, ປະກອບມີ 3 ໜ່ວຍງານ ແລະ ມີ 2 ດ່ານປະເພນີຂຶ້ນກັບ. ຜ່ານການຈັດຕັ້ງປະຕິບັດແຜນຈັດເກັບລາຍຮັບປີ 2020 ແຜນເບື້ອງຕົ້ນ 415 ຕື້ກວ່າກີບ ແລະ ແຜນດັດແກ້ 204 ຕື້ກວ່າກີບ ສາມາດປະຕິບັດໄດ້ພຽງ 181 ກວ່າກີບ, ຖ້າທຽບໃສ່ແຜນການເບື້ອງຕົ້ນ 415 ຕື້ກວ່າກີບ ເທົ່າກັບ 43%, ຫຼຸດແຜນ 56,29%, ເປັນເງິນ 233 ຕື້ກວ່າກີບ, ຖ້າທຽບໃສ່ແຜນດັດແກ້ 204 ຕື້ກວ່າກີບ ຫຼຸດແຜນ 11,17% ເປັນເງິນ 22 ຕື້ກວ່າກີບ. ສາເຫດທີ່ບໍ່ສາມາດຈັດເກັບລາຍຮັບໄດ້ຕາມແຜນການ ແມ່ນເກີດມາຈາກຫຼາຍປັດໄຈເປັນຕົ້ນແມ່ນ ຕົ້ນປີ 2020 ເກີດການລະບາດຂອງພະຍາດໂຄວິດ-19 ໃນທົ່ວໂລກ ແລະ ພາກພື້ນ.

ດ່ານພາສີສາກົນນໍ້າພາວໄດ້ປິດການບໍລິການນໍາເຂົ້າ-ສົ່ງອອກສິນຄ້າ ລະຫວ່າງປະເທດໄລຍະໜຶ່ງ, ລາຍຮັບຕົ້ນຕໍຈາກສິນຄ້ານໍາເຂົ້າມີລັກສະນະຫຼຸດລົງເປັນຕົ້ນ ແມ່ນນໍ້າ ມັນເຊື້ອໄຟ, ປະເພດສີ້ນສ່ວນພາຫະນະ, ອາໄຫຼ່, ເຄື່ອງໃຊ້ໄຟຟ້າ ແລະ ການປະຕິບັດກົດໝາຍ ແລະ ນິຕິກຳລຸ່ມກົດໝາຍທີ່ກ່ຽວຂ້ອງ ເຮັດໃຫ້ຜູ້ປະກອບການນຳເຂົ້າ-ສົ່ງອອກສິນຄ້າໄດ້ນຳໃຊ້ກອບສັນຍາສອງ ຝ່າຍລາວ-ຫວຽດນາມ, ສິນຄ້າອາຊຽນ ແລະ ການຫຼຸດຜ່ອນອັດຕາພາສີໃນກອບການຄ້າເສລີ (AFTA) ແລະ ການນໍາເຂົ້າສິນຄ້າບາງປະເພດຂອງຜູ້ປະກອບການທຸລະກິດ ແມ່ນປະຕິບັດຕາມນະໂຍບາຍສົ່ງເສີມການ ລົງທຶນໄດ້ຮັບການຍົກເວັ້ນ, ຫຼຸດຜ່ອນ ຄ່າພາສີ-ອາກອນເປັນເງິນ 122 ຕື້ກວ່າກີບ, ສິນຄ້າທີ່ງົດເກັບພາສີ-ອາກອນຄິດເປັນເງິນ 3 ຕື້ກວ່າກີບ.


ທ່ານ ຫົວໜ້າດ່ານພາສີສາກົນນໍ້າພາວ ຍັງໄດ້ໃຫ້ຮູ້ຕື່ມວ່າ: ສຳລັບຄາດໝາຍຈັດເກັບລາຍຮັບໃນປີ 2021 ໃນຈຳນວນ 319 ຕື້ກວ່າກີບ ທີ່ໄດ້ຮັບມອບໝາຍຈາກຂັ້ນເທິງ ຄະນະຮັບຜິດຊອບຈະພະຍາຍາມສູ້ຊົນຈັດເກັບໃຫ້ບັນລຸຕາມແຜນການທີ່ວາງໄວ້ ໂດຍຈະເພີ່ມທະວີການສຶກສາອົບຮົມການເມືອງ-ແນວຄິດ ໃນຖັນແຖວໃຫ້ພະນັກງານ, ສະມາຊິກພັກ, ເຂັ້ມງວດ, ຕິດຕາມ ແລະ ກວດກາ ການປະຕິບັດໜ້າທີ່ຂອງພະນັກງານທຸກພາກສ່ວນ, ທີ່ກ່ຽວຂ້ອງ ບັນດາຂະແໜງການຕ່າງໆໃນດ່ານສາກົນ, ດ່ານທ້ອງຖິ່ນ ແລະ ດ່ານປະເພນີ, ປຸກລະດົມ ແລະ ເອື້ອອຳນວຍຊຸກຍູ້ຜູ້ປະກອບການໃຫ້ນຳເຂົ້າ-ສົ່ງອອກສິນຄ້າເປັນປົກກກະຕິ ພ້ອມມອບພັນທະເຂົ້າງົບປະມານຕາມລະບຽບການທີ່ກຳນົດໄວ້, ຕ້ານ-ສະກັດກັ້ນການລັກລອບສິນຄ້າໜີພາສີ.
(ຂ່າວ-ພາບ:ສາຍະໝອນ)