18/04/2021

ເປັນເລື່ອງ

ເປັນຂ່າວ

ແຂວງເຊກອງ ຖືການຜະລິດເປັນສິນຄ້າ ຕໍ່ຍອດເສດຖະກິດສ້າງລາຍຮັບ

ແຂວງເຊກອງ ໄດ້ຍົກສູງປັບປຸງຊີວິດການເປັນຢູ່ຂອງປະຊາຊົນ ດ້ວຍການຊຸກຍູ້ຢ່າງແຂງແຮງໃນການພັດທະນາເສດຖະກິດ ໂດຍຖືເອົາການຜະລິດເປັນສິນຄ້າ, ສົ່ງເສີມຫົວຄິດປະດິດສ້າງຂອງປະຊາຊົນ, ປຸກລະດົມແນວຄວາມຄິດເພິ່ງຕົນເອງ, ກຸ້ມຕົນເອງ, ສ້າງຄວາມເຂັ້ມແຂງດ້ວຍຕົນເອງ ເພື່ອແນໃສ່ເຮັດໃຫ້ເສດຖະກິດຂະຫຍາຍຕົວໄດ້ຢ່າງຕໍ່ເນື່ອງໄປພ້ອມກັບດ້ານອື່ນໆ.

ທ່ານ ຂັນຕີ ສີລະວົງສາ ຮອງເຈົ້າແຂວງເຊກອງ ຜູ້ຊີ້ນໍາເສດຖະກິດຂັ້ນແຂວງໃຫ້ສໍາພາດ ໃນວັນທີ 5 ເມສາ ຜ່ານມາວ່າ: ໃນປີຜ່ານມາ, ເຊກອງຖືວ່າເປັນອີກແຂວງໜຶ່ງທີ່ໄດ້ຮັບຜົນກະທົບຈາກໄພພິ ບັດທໍາມະຊາດ ແລະ ການແຜ່ລະບາດຂອງພະຍາດໂຄວິດ-19, ແຕ່ພາຍໃຕ້ການນໍາພາຂອງອົງຄະນະພັກ ແຂວງ ສາມາດຍາດໄດ້ຜົນງານຫຼາຍດ້ານ.

ສຳລັບການພັດທະນາເສດຖະກິດ ໄດ້ຍົກສູງປັບປຸງຊີວີດການເປັນຢູ່ຂອງປະຊາຊົນ ດ້ວຍການຊຸກຍູ້ຢ່າງແຂງແຮງໃນການພັດທະນາເສດຖະກິດ-ສັງຄົມ ໂດຍຖືເອົາການຊຸກຍູ້ການຜະລິດເປັນສິນຄ້າ, ສົ່ງເສີມຫົວຄິດປະດິດສ້າງຂອງປະຊາຊົນ, ປຸກລະດົມແນວຄິດເພິ່ງຕົນເອງ, ກຸ້ມຕົນເອງ, ສ້າງຄວາມເຂັ້ມແຂງດ້ວຍຕົນເອງ ແນໃສ່ເຮັດໃຫ້ເສດຖະກິດຂະຫຍາຍຕົວຢ່າງຕໍ່ເນື່ອງໄປພ້ອມກັບດ້ານອື່ນໆ ເປັນຕົ້ນ ວຽກງານກະສິກຳ ແລະ ປ່າໄມ້ ສາມາດສົ່ງອອກຜະລິດຕະພັນກະສິກໍາທັງພາຍໃນ ແລະ ຕ່າງປະເທດໄດ້ທັງໝົດ 17.142 ໂຕນຄິດເປັນມູນຄ່າເກືອບ 10 ລ້ານໂດລາ.

ພ້ອມທັງ ຄຸ້ມຄອງ ແລະ ກວດກາປົກກະຕິ ບັນດາຫ້າງຮ້ານ, ຫົວໜ່ວຍທຸລະກິດຕ່າງໆ; ການພັດທະນາພື້ນຖານໂຄງລ່າງໃຫ້ໄດ້ຮັບການປັບປຸງ ແລະ ກໍ່ສ້າງໃໝ່ ນັບມື້ດີຂຶ້ນເປັນກ້າວໆ ຊຶ່ງປັດຈຸບັນ ທົ່ວແຂວງມີເສັ້ນທາງ 286 ເສັ້ນ, ຍາວ 2 ພັນກວ່າກິໂລແມັດ, ມີບ້ານທີ່ມີເສັ້ນທາງເຂົ້າເຖິງ 195 ບ້ານ ກວມເອົາ 98,9% ຂອງບ້ານທັງໝົດທົ່ວແຂວງ, ໄດ້ຂະຫຍາຍຕາຂ່າຍໄຟຟ້າເຂົ້າຫາບ້ານໃນທົ່ວແຂວງ ແລະ ຂົງ ເຂດອື່ນໆ ກໍມີທ່າຂະຫຍາຍຕົວ.

ສຳລັບການພັດທະນາໃນປີ 2021, ທ່ານ ຂັນຕີ ສີລະວົງສາ ໄດ້ກ່າວວ່າ: ແຂວງໄດ້ຕັ້ງເປົ້າໝາຍສູ້ຊົນເຮັດໃຫ້ລວມຍອດຜະລິດຕະພັນພາຍໃນ (GDP) ບັນລຸໄດ້ 1.863 ຕື້ກີບ ທຽບໃສ່ປີຜ່ານມາເພີ່ມຂຶ້ນ 4% ແລະ ມູນຄ່າ (GDP) ຕໍ່ຫົວຄົນໃຫ້ໄດ້ 14,26 ລ້ານກີບ ຫຼື ເທົ່າກັບ 1.761 ໂດລາ/ຄົນ/ປີ, ໃນນັ້ນຜະລິດຕະພັນກະສິກໍາ-ປ່າໄມ້ເພີ່ມຂຶ້ນ 7% ກວມເອົາ 41%; ຂະແໜງອຸດສາຫະກໍາເພີ່ມຂຶ້ນ 4,5% ກວມເອົາ 23% ແລະ ຂະແໜງບໍລິການເພີ່ມຂຶ້ນ 3,2% ກວມເອົາ 36% ຂອງ GDP.

(ຂ່າວ-ພາບ: ສັນຍາ)