04/08/2021

ເປັນເລື່ອງ

ເປັນຂ່າວ

WHO ເຜີຍໂຄວິດສາຍພັນອິນເດຍລະບາດໃນ 17 ປະເທດແລ້ວ

ຂ່າວຕ່າງປະເທດລາຍງານ ວັນທີ 28 ເມສາທີ່ຜ່ານມາ, ອົງການອະນາໄມໂລກ (WHO) ລະບຸວ່າ: ເຊື້ອໄວຣັດໂຄວິດ-19 ສາຍພັນ B.1.617 ຊຶ່ງພົບການລະບາດຄັ້ງທຳອິດໃນ ອິນເດຍ ແລະ ເປັນທີ່ຮູ້ຈັກກັນໃນຊື່ຂອງເຊື້ອໂຄວິດສາຍພັນອິນເດຍ ໄດ້ແຜ່ລະບາດໄປຢ່າງໜ້ອຍ 17 ປະເທດທົ່ວໂລກ.

WHO ກ່າວໃນບົດລາຍງານສະຖານະການແຜ່ລະບາດຂອງພະຍາດໂຄວິດ-19 ປະຈຳອາທິດນີ້ພົບວ່າ: ເຊື້ອໂຄວິດສາຍພັນ B.1.617 ມີອັດຕາການແຜ່ເຊື້ອສູງກວ່າເຊື້ອໂຄວິດສາຍພັນອື່ນໆ ໃນອິນເດຍ ແລະ ມີທ່າອ່ຽງທີ່ຈະເຮັດໃຫ້ເກີດການແຜ່ລະບາດເພີ່ມຫຼາຍຂຶ້ນ. ເຖິງຢ່າງໃດກໍຕາມ, WHO ໄດ້ກ່າວເນັ້ນວ່າ: ເຊື້ອພະຍາດໂຄວິດສາຍພັນອື່ນໆ ກໍມີທ່າອ່ຽງກໍ່ໃຫ້ເກີດການແຜ່ລະບາດເພີ່ມຫຼາຍຂຶ້ນເຊັ່ນດຽວກັນ ແລະ ການລະບາດຂອງເຊື້ອໂຄວິດສາຍພັນ B.1.617 ແລະ ສາຍພັນອື່ນໆ ອາດຈະເປັນປັດໄຈສໍາຄັນທີ່ເຮັດໃຫ້ຈຳນວນຜູ້ປ່ວຍຕິດເຊື້ອໃນ ອິນເດຍ ເພີ່ມສູງຂຶ້ນອີກຄັ້ງ. ນອກຈາກນີ້, ຜົນການສຶກສາຕ່າງໆຍັງຊີ້ໃຫ້ເຫັນວ່າ: ການແຜ່ລະບາດຮອບ 2 ຈະໄວກວ່າການລະບາດຄັ້ງທຳອິດ ລວມເຖິງປັດໄຈອື່ນໆ ທີ່ເຮັດໃຫ້ມີຈຳນວນຜູ້ປ່ວຍເພີ່ມສູງຂຶ້ນເຊັ່ນ: ການບໍ່ປະຕິບັດຕາມມາດຕະການດ້ານສາທາລະນະສຸກ ແລະ ການລວມຕົວກັນເປັນກຸ່ມໃຫຍ່.


ເມື່ອບໍ່ດົນມານີ້, WHO ໄດ້ປະກາດໃຫ້ເຊື້ອພະຍາດໂຄວິດສາຍພັນ B.1.617 ເປັນສາຍພັນທີ່ຕ້ອງຄອຍສັງເກດ, ແຕ່ຈົນເຖິງໃນຂະນະນີ້ ຍັງບໍ່ທັນໄດ້ປະກາດໃຫ້ເປັນສາຍພັນທີ່ໜ້າກັງວົນ ຊຶ່ງເປັນການຊີ້ໃຫ້ເຫັນວ່າ: ເຊື້ອໂຄວິດສາຍພັນດັ່ງກ່າວອັນຕະລາຍກວ່າເຊື້ອໂຄວິດສາຍພັນດັ້ງເດີມເຊັ່ນ: ການແຜ່ລະບາດໄດ້ໄວຂຶ້ນ, ເຮັດໃຫ້ມີຜູ້ເສຍຊີວິດຫຼາຍຂຶ້ນ ຫຼື ຕ້ານທານວັກຊິນປ້ອງກັນພະຍາດໂຄວິດ-19 ໄດ້ຫຼາຍຂຶ້ນ.